Tensionet midis Indisë dhe Pakistanit janë rritur ndjeshëm pas një sulmi të përgjakshëm në Kashmirin Indian, ku u vranë 26 persona. Pas këtij sulmi, India nisi “Operacionin Sindoor” kundër Pakistanit, duke goditur disa pika në territorin e Pakistanit dhe në pjesën e Kashmirit që kontrollon ky shtet. Nga përplasjet kanë humbur jetën 31 civilë, 26 nga sulmet me raketa të Indisë dhe 5 nga zjarri i artilerisë në Vijën e Kontrollit, ndërsa India njofton se ka humbur 3 të vrarë nga të shtënat pakistaneze.
Ky konflikt ka rrënjët e tij në vitin 1947, kur u ndanë India dhe Pakistani, duke krijuar tensione të vazhdueshme për kontrollin e rajonit të Kashmirit, i cili është i pasur me burime natyrore dhe ka rëndësi strategjike. Pjesa e Kashmirit e administruar nga India është një nga zonat më të militarizuara në botë, ku janë zhvilluar disa luftëra dhe ka pasur sulme të shumta terroriste, duke shkaktuar dhjetëra viktima, përfshirë civilë dhe ushtarë. Pas sulmeve të vitit 2008 në Mumbai, procesi i paqes ka dështuar, dhe tensionet janë rikthyer shpesh.
India dhe Pakistani janë të dy shtete të armatosura me armë bërthamore, dhe një përballje ushtarake mund të çojë në një luftë të plotë, që mund të përshkallëzohet shpejt dhe të ketë pasoja globale. Pas sulmit në Kashmir, shumë shtete, përfshirë SHBA-në, Iranin dhe Arabinë Saudite, kanë bërë thirrje për dialog dhe përmbajtje nga të dyja palët. Megjithatë, India ka vazhduar të reagojë më agresivisht dhe duket se është e gatshme të ndërmarrë veprime ushtarake të kufizuara, si sulme ajrore ose operacione speciale, për të qetësuar tensionet dhe për të shmangur një luftë të gjerë.
Në këtë kontekst, shumë analistë të sigurisë paralajmërojnë për mundësinë e një përshkallëzimi të shpejtë të situatës, për shkak të ndihmës që Pakistanin ka dhënë grupeve militante në Kashmirin Indian dhe pasigurisë që mbizotëron në të dyja palët.
