Një tjetër ngjarje e rëndë ka tronditur vendin këtë të shtunë, duke vënë sërish në qendër të vëmendjes mungesën e standardeve të sigurisë në vendin e punës. Dy punëtorë humbën jetën në fshatin Holtë, Njësia Administrative Poroçan, në bashkinë e Gramshit, teksa punonin në një kantier ndërtimi të një hidrocentrali privat.
Sipas të dhënave nga policia, viktimat janë Abas Basha, 22 vjeç, dhe Egzon Lleshi, 32 vjeç. Dyshohet se ata u zunë poshtë nga një masiv dheu që rrëshqiti papritur, ndërsa ndodheshin në vendin e punës.
Ngjarja ndodhi rreth mesditës dhe hetimet paraprake tregojnë për një aksident të mundshëm për shkak të kushteve të papërshtatshme të sigurisë. Grupi hetimor ndodhet në terren për të dokumentuar rrethanat e plota dhe për të përcaktuar nëse janë shkelur protokollet ligjore të sigurisë.
Tragjedia ka ngritur sërish alarmin për mungesën e mbikëqyrjes nga institucionet përgjegjëse, veçanërisht në kantieret e kompanive private, ku shpesh mungojnë kontrollet dhe masat mbrojtëse për punëtorët.
Familjarët e viktimave dhe qytetarë të shumtë kërkojnë drejtësi dhe transparencë për ngjarjen, ndërkohë që bilanci i aksidenteve në punë vijon të rritet. Vetëm gjatë muajit maj 2024 janë raportuar gjashtë viktima në vende të ndryshme të punës, përfshirë ndërtimin dhe minierat, duke thelluar shqetësimin për nivelin e ulët të sigurisë në sektorin e punësimit në Shqipëri.
