Një nga 52 të arrestuarit në kuadër të operacionit ndërkombëtar të koduar “Ura” është edhe administrator i kompanisë të autobusëve të linjës Shqipëri-Itali, “Ligori Travel”, Ligor Çombashi. Ai u arrestua në orët e para të mëngjesit të 21 majit në banesën e tij në Sheq Marinas. Çombashi, i njohur për lidhjet me aktivitetet e paligjshme, ka qenë i përfshirë më parë edhe në një rast kontrabande mallrash në vitin 2016.
Hetimet sugjerojnë se Çombashi mund të ketë transportuar shuma të mëdha parash që lidhen me aktivitete kriminale nga Italia në Shqipëri. Operacioni i drejtuar nga SPAK dhe Prokuroria e Republikës së Barit ka çuar në 52 masa sigurimi, përfshirë arrestimin e 40 shtetasve shqiptarë dhe 12 italianë, të përfshirë në grupe të organizuara kriminale që operonin në Shqipëri dhe Itali.
Operacioni, që ka zgjatur nga viti 2020 deri në 2025, ka dokumentuar 40 episode të trafikimit të lëndëve narkotike dhe sekuestrimin e sasive të mëdha heroine dhe kokaine. Hetimet kanë zbuluar gjithashtu se pagesat për drogat realizoheshin përmes linjave ndërkombëtare të autobusëve, ndërsa vlera e transaksioneve të dokumentuara arrin në 4.5 milionë euro.
Ky operacion është një hap i rëndësishëm në luftën kundër krimit të organizuar dhe pastrimit të parave, duke përfshirë edhe sekuestrimin e pasurive dhe shuma të mëdha parash. Hetimet vijojnë dhe autoritetet janë angazhuar për zbardhjen e mëtejshme të lidhjeve dhe personave të tjerë të përfshirë.
