Komiteti Ekzekutiv i UEFA-s, në mbledhjen e mbajtur në Bilbao, ka miratuar formatin e ri të kualifikueseve për Kampionatin Europian 2028 dhe ka zyrtarizuar ndarjen e përfitimeve financiare për klubet për periudhën 2024–2028.
EURO 2028 do të zhvillohet në Mbretërinë e Bashkuar dhe Irlandë, me 24 skuadra pjesëmarrëse. Kualifikimet do të zhvillohen në 12 grupe me 4 ose 5 ekipe, ku 12 fituesit dhe tetë vendet e dyta më të mira do të sigurojnë kualifikimin direkt. Vendet pritëse do të marrin pjesë në kualifikime dhe mund të përfitojnë vende të rezervuara nëse nuk kualifikohen përmes grupeve.
Ndërkohë, UEFA ka miratuar edhe një paketë financiare prej 244 milionë euro për klubet që lëshojnë lojtarë në ndeshjet e kombëtareve, përfshirë Nations League dhe EURO 2028.
Mbledhja e radhës e Komitetit Ekzekutiv pritet të zhvillohet më 11 shtator në Tiranë.
