Alan Yentob, një prej emrave më të njohur dhe më ndikues në historinë e BBC-së, ka ndërruar jetë në moshën 78-vjeçare. Lajmin e konfirmoi familja e tij përmes një deklarate zyrtare nga BBC, duke bërë të ditur se Yentob ndërroi jetë të shtunën.
Në një mesazh prekës, gruaja e tij, Philippa Walker, e përshkroi Alanin si një njeri të veçantë dhe me një shpirt të gjallë: “Çdo ditë me Alanin ishte një aventurë e re. Ai ishte i mbushur me kuriozitet, energji dhe një ndjenjë të fortë të ndershmërisë. Një njeri i sjellshëm dhe i dashur, që na la një trashëgimi të jashtëzakonshme dashurie dhe kreativiteti.”
Yentob filloi karrierën e tij në BBC në vitin 1968 si praktikant dhe përmes angazhimit të tij u ngjit në pozicione të larta drejtuese, duke përfshirë kontrolluesin e kanaleve BBC One dhe BBC Two, si dhe drejtor të televizionit. Ai drejtoi edhe njësitë e ndryshme të BBC-së si muzika, arti, drama, argëtimi dhe programet për fëmijë, duke lënë gjurmë të thella në zhvillimin e kulturës mediatike britanike.
