Një ngjarje tronditëse ka ndodhur mbrëmjen e së shtunës në qytetin Tolentino të Italisë, ku një grua shqiptare, 45-vjeçarja Gentiana Hudhra, u vra me thikë në rrugë nga ish-bashkëshorti i saj, Nikollaq Hudhra.
Krimi ndodhi në qendër të qytetit, në viale Benadduci, rreth orës 20:00. Sipas policisë, autori e kishte ndjekur viktimën me monopatinë elektrike dhe e kishte sulmuar disa herë me thikë në qafë dhe shpatulla. Edhe pasi ajo kishte rënë në tokë, ai e kishte goditur sërish.
Pasi kreu krimin, 61-vjeçari u ul në një stol pranë trupit të pajetë dhe nuk u largua. Ai u arrestua në vendngjarje nga karabinierët dhe ndodhet në paraburgim në Montacuto, Ankona. Gjatë marrjes në pyetje, mësohet të ketë deklaruar se veprimin e bëri “për të mbrojtur fëmijët”.
Çifti kishte dy vajza të rritura, ndërsa autoritetet italiane kanë ofruar ndihmë psikologjike për to. Hetimet po vijojnë për të zbuluar nëse kishte histori dhune të mëparshme mes tyre.
Vendi i ngjarjes është kthyer në pikë homazhi për qytetarët, të cilët kanë vendosur lule dhe mesazhe ngushëllimi në nder të viktimës.
