Presidenti francez Emmanuel Macron mbërriti sot në Grenlandë në një vizitë simbolike dhe politike, ku u prit nga kryeministrja e Danimarkës Mette Frederiksen dhe kryeministri i Grenlandës. Gjatë takimeve, Macron theksoi rëndësinë e forcimit të sovranitetit dhe integritetit territorial të ishullit arktik, duke shprehur solidaritetin e Francës dhe Bashkimit Evropian.
Bisedimet u fokusuan në sigurinë në rajonin e Atlantikut të Veriut dhe Arktik, ndryshimet klimatike, tranzicionin energjetik dhe furnizimin me metale të rralla. Kjo vizitë vjen pas interesave të shprehura nga presidenti amerikan Donald Trump për kontrollin e Grenlandës, një territor autonom nën Danimarkë me rëndësi strategjike dhe burime natyrore të pasura.
Macron theksoi se synimi është të forcohet bashkëpunimi dhe të mbrohet sovraniteti evropian përballë sfidave gjeopolitike globale.
