Adriatik Lapaj, kryetar i koalicionit “Nisma Shqipëria Bëhet”, ka depozituar një padi në Kolegjin Zgjedhor kundër vendimit të KAS dhe pjesërisht ndaj KQZ, pas rrëzimit të pretendimit të tij për mandatin e deputetit në qarkun e Tiranës.
Lapaj kërkon që të njihet si fitues përmes votave preferenciale dhe të konsiderohet i pavlefshëm procesi i revokimit të dorëheqjeve të mëparshme nga disa kandidatë të listës, përfshirë Kleana Xhuvelin dhe Zeqir Kordonin.
Pas vendimit të KAS më 30 korrik, mandati i vetëm i këtij koalicioni në Tiranë i kaloi Ana Dajkos, e para në listën e mbyllur, duke përjashtuar çdo pretendim nga kandidatët që kishin dhënë dorëheqje më herët.
Lapaj kërkon tani që të rikthehet procesi në vlerësimin e votës së qytetarëve dhe të mos shpërfillet renditja sipas përzgjedhjes preferenciale.
