Një biznes që merrej me tregtinë e produkteve blegtorale është zbuluar duke fshehur të ardhura prej 10 milionë eurosh gjatë dy viteve të fundit.
Administrata Tatimore njoftoi se pas një hetimi të thelluar, u identifikua subjekti që kryente evazion fiskal duke mos lëshuar faturë për një pjesë të madhe të shitjeve.
Kontrollet janë kryer në periferi të Tiranës, ku Task-Forca e Administratës Tatimore në bashkëpunim me strukturat e Ministrisë së Bujqësisë zbuluan këtë shkelje.
Në njoftim theksohet se nuk do të tolerohen raste të tilla dhe bëhet apel që bizneset të respektojnë ligjin, ndërsa qytetarët të denoncojnë çdo abuzim për formalizimin e tregut dhe sigurinë ushqimore.
Gjatë inspektimit u konstatua se subjekti operonte me produkte pa faturë tatimore, ndërsa analizimi i pajisjeve elektronike të biznesit tregoi se të ardhurat ishin fshehur qëllimisht.
