Një ngjarje shumë e rëndë ka ndodhur në fshatin Kullollas të Gramshit. Një i moshuar rreth 80 vjeç ka humbur jetën nga asfiksia, pasi dyshohet se zjarri që ishte ndezur në oborrin e shtëpisë doli jashtë kontrollit.
Nusja e djalit të tij, e cila përfundoi në spital me asfiksi të lehtë, rrëfen se ka qenë vajza e saj që e ka lajmëruar për flakët.
Ajo ka tentuar ta shuajë zjarrin me ujë, por gjithçka ndodhi shumë shpejt.
“Po hiqja plehrat kur më tha vajza që kishte rënë zjarr. Vrapova, mora ujë por s’po bëja dot gjë. I thashë vjehrrit, por kur e kërkova më vonë… ç’të shihja.
S’ka qenë ai që e ndezi zjarrin,” tregoi ajo mes lotësh.
Sipas saj, nuk ka mbetur më asnjë shtëpi në fshat. Zjarret po përhapen me shpejtësi dhe situata mbetet kritike në shumë zona të Gramshit.
