Zjarret nuk ndalen. Vetëm në ekonominë pyjore të Kurorës së Dardhës janë aktive rreth 30 vatra, duke përfshirë afro 50 hektarë pyje me pisha dhe bredha.
Era e fortë ka favorizuar përhapjen masive të flakëve, duke vështirësuar ndërhyrjen nga toka.
Në terren janë angazhuar forcat pyjore të bashkisë Fushë-Arrëz, trupa të ushtrisë dhe shërbimet pyjore të Fushë-Arrëzit, Pukës dhe Kukësit, por situata mbetet kritike.
Zjarret kanë bllokuar rrugën kombëtare Fushë-Arrëz – Bajram Curri dhe kanë vënë në rrezik linjat e tensionit të lartë në Tropojë, si dhe rrugën Tropojë – Qafë Mali – Fushë-Arrëz.
Banorët e fshatrave Xath dhe Flet janë evakuuar për shkak të afërsisë së flakëve me linjat e energjisë që lidhin hidrocentralin e Fierzës me nënstacionin e Fushë-Arrëzit.
