Duke përshkruar takimin, ish-ambasadori i SHBA-së në OKB dhe këshilltari i sigurisë kombëtare John Bolton i tha CNN se “Trump nuk humbi, por Putini fitoi qartësisht”.
“Trump nuk mori asgjë tjetër përveç mundësisë së takimeve të tjera. Putin, mendoj, ka bërë hapa në drejtim të rivendosjes së marrëdhënieve, të cilat gjithmonë i kam menduar si qëllimi i tij kryesor. Ai i ka shmangur sanksionet, nuk duket se po shkon drejt një armëpushimi, takimi i ardhshëm nuk është caktuar ende, [Presidenti ukrainas] Zelensky nuk u informua për asgjë nga këto para konferencës për shtyp. Jemi larg fundit, por do të thoja se Putini arriti shumicën e asaj që donte dhe Trump arriti shumë pak.”
“Dhe do të doja të shtoja edhe një gjë. Trump dukej shumë i lodhur”, shtoi Bolton. “Jo i frustruar, por i lodhur. Dhe duhet të mendojmë se çfarë do të thotë kjo”.
Megjithatë, një analizë e BBC-së ngre pyetjen e mëposhtme: Pas takimit të dy burrave dhe duke pasur parasysh dështimin për të arritur një marrëveshje, si do të vazhdojë Trump me sanksionet e reja me të cilat e kishte kërcënuar së fundmi Rusinë? Presidenti amerikan nuk dha detaje në intervistën që dha për Fox News, duke deklaruar thjesht se “do ta shqyrtojë çështjen brenda dy ose tre javësh”.
Steve Rosenberg i BBC-së, nga ana e tij, në një analizë të drejtpërdrejtë, ngre pyetjen e mëposhtme: “Kur një konferencë për shtyp nuk është konferencë për shtyp?” “Sigurisht, kur nuk bëhen pyetje”, përgjigjet vetë gazetari, duke iu referuar kushtit të veçantë që të mos u bëhen pyetje dy udhëheqësve nga gazetarët e pranishëm . “Trump nxiti një armëpushim që Putini nuk ia dha”, vazhdon Rosenberg, duke vlerësuar se takimi në Alaska e solli Vladimir Putinin në ballë të skenës gjeopolitike.
