Bashkia Shkodër ka marrë vendim që agjencitë funerale të largohen nga zonat e banuara, shkollat dhe Qendra Historike e qytetit.
Ky vendim erdhi pas shqetësimeve të qytetarëve për praninë e tyre pranë banesave dhe institucioneve arsimore.
Afati i fundit për zbatimin e rregullave të reja është 25 shtatori.
Pas kësaj date, agjencitë që nuk i përmbushin kriteret nuk do të lejohen të vazhdojnë aktivitetin në këto zona.
Sipas rregullores, aktiviteti i agjencive funerale ndalohet në rrugët kryesore të Qendrës Historike, në godina banimi shumëfamiljare, dhe ato duhet të jenë të paktën 50 metra larg shkollave.
Po ashtu, automjetet funerale nuk do të lejohen të parkojnë në hapësira publike.
Kryebashkiaku Benet Beci falenderoi ato agjenci që kanë nisur të përshtaten me rregullat dhe theksoi se masa synon të krijojë një ambient më të qetë dhe të respektueshëm për banorët.
