Ukraina do të angazhohet të blejë armë amerikane me vlerë 100 miliardë dollarë, të financuara nga Evropa, në një përpjekje për të siguruar garanci sigurie nga SHBA- të pas një marrëveshjeje paqeje me Rusinë , sipas një dokumenti të cituar nga Financial Times.
Sipas propozimit, Kievi dhe Uashingtoni do të nënshkruanin gjithashtu një marrëveshje prej 50 miliardë dollarësh për të prodhuar dronë me kompanitë ukrainase që kanë qenë pioniere në këtë teknologji që nga pushtimi rus në vitin 2022.
Kievi ka ndarë propozime të pazbuluara më parë për marrëveshje të reja sigurie me Shtetet e Bashkuara në një listë pikash diskutimi për aleatët evropianë përpara një takimi me Presidentin e SHBA-së Donald Trump në Shtëpinë e Bardhë të hënën.
Dokumenti nuk specifikon se çfarë armësh kërkon Ukraina, por Kievi e ka bërë të qartë se dëshiron të paktën dhjetë sisteme mbrojtëse ajrore Patriot të prodhuara në SHBA për të mbrojtur qytetet dhe infrastrukturën kritike , së bashku me raketa dhe pajisje të tjera . Është gjithashtu e paqartë se sa nga plani i dronëve do të jetë për furnizime dhe sa për investime.
Propozimi ukrainas synon të përmbushë dëshirën e Trump për të nxitur industrinë amerikane. I pyetur në Shtëpinë e Bardhë të hënën në lidhje me ndihmën e mëtejshme ushtarake për Ukrainën, Trump tha: “Ne nuk po japim asgjë. Ne po shesim armë.”
Dokumenti përshkruan se si Ukraina synon t’i kundërpropozojë Shteteve të Bashkuara pasi Trump duket se u përafrua me qëndrimin rus për t’i dhënë fund luftës pas takimit me Presidentin Vladimir Putin në Alaska javën e kaluar.
Kievi e hedh poshtë propozimin e Putinit
Sipas dokumentit, Ukraina nuk do të pranojë asnjë marrëveshje që do të përfshinte lëshime territoriale ndaj Rusisë dhe këmbëngul që armëpushimi është hapi i parë drejt një marrëveshjeje të plotë paqeje.
Ai gjithashtu hedh poshtë propozimin që Putini i bëri Trumpit në Alaska për të ngrirë vijën e mbetur të frontit nëse Ukraina tërheq trupat e saj nga pjesët pjesërisht të pushtuara të Donetskut dhe Luhanskut. Një veprim i tillë, thuhet në dokument, do të krijonte “një trampolinë për një përparim të ri dhe të shpejtë të forcave ruse drejt qytetit të Dnipros” dhe do t’i lejonte Putinit “të arrinte qëllimet e agresionit me mjete të tjera”.
Pala ukrainase beson se përpjekja e Rusisë për të zgjidhur çështjet territoriale para bisedimeve për një paqe të qëndrueshme do të krijonte një fakt të kryer në terren pa siguruar sigurinë e ardhshme të Kievit.
