Prokuroria e Tiranës ka sekuestruar 18 pasuri të paluajtshme, llogari bankare dhe automjete luksoze të K.K., i dënuar për trafik droge në Itali.
Sipas njoftimit të prokurorisë, disa prej pasurive ishin transferuar në emër të nënës së tij pensioniste.
Veprimi u krye në kuadër të hetimeve për veprimtarinë kriminale të K.K., i cili ishte pjesë e një rrjeti të strukturuar të trafikut të narkotikëve në Itali gjatë periudhës 2007-2012.
Prokuroria ka evidentuar pasuri të shumta të paluajtshme, dy automjete luksoze dhe llogari bankare në emër të tij dhe të nënës së tij, si dhe të subjektit juridik “Kriol.AL” sh.p.k.
Në total janë vendosur masa sekuestroje preventive mbi 18 pasuri, përfshirë prona në Tiranë, Bathore, Farkë dhe Marikaj, me qëllim parandalimin e tjetërsimit të këtyre pasurive dhe garantimin e ekzekutimit të vendimeve gjyqësore për konfiskimin e tyre.
Hetimet vijojnë, ndërkohë që pritet identifikimi i pasurive të tjera të lidhura me veprimtarinë kriminale.
