Ministria e Arsimit ka miratuar Kodin e ri të Etikës për mësuesit parauniversitarë, i cili vendos rregulla të reja për sjelljen profesionale marrëdhëniet me nxënësit, prindërit dhe komunitetin, si dhe përdorimin e rrjeteve sociale.
Sipas Kodit, mësuesit ndalohen të publikojnë imazhe ose video që komprometojnë rolin e tyre edukues. Ata duhet të ruajnë standardet etike në komunikimin online dhe janë të detyruar të edukojnë nxënësit për përdorimin e sigurt të internetit dhe identifikimin e informacionit të rremë.
Kodi i ri, që zëvendëson versionin e vitit 2011, përfshin gjithashtu udhëzime për veshjen, paraqitjen dhe gjuhën e përdorur nga mësuesit në marrëdhëniet e përditshme. Mësuesit duhet të ndërhyjnë në rastet e bullizmit dhe dhunës në shkollë dhe të ndërtojnë marrëdhënie bashkëpunuese me prindërit.
