Presidenti i Republikës, Bajram Begaj, çeli vitin e ri shkollor nga shkolla e tij e fëmijërisë në fshatin Gosë.
Gjatë vizitës, ai uroi nxënësit dhe mësuesit për një vit të suksesshëm dhe theksoi rolin vendimtar që ka arsimi në zhvillimin e individit dhe shoqërisë.
“Një shkollë e fortë formëson qytetarë të ditur, dhe qytetarët e ditur ndërtojnë një Shqipëri më të fortë,” u shpreh kreu i shtetit. Ai u ndal veçanërisht te rëndësia e ruajtjes së gjuhës shqipe dhe vlerave njerëzore, duke theksuar se teknologjia duhet të përdoret me kujdes dhe pa humbur kontaktin njerëzor.
Presidenti ndau edhe një mesazh të ngrohtë me nxënësit e klasës së parë, duke i inkurajuar të punojnë me pasion, të jenë kureshtarë dhe të ndërtojnë miqësi të sinqerta në shkollë.
Në përfundim, Begaj vlerësoi rolin e mësuesve si themelet e së ardhmes, ndërsa u bëri thirrje prindërve dhe komunitetit të jenë pjesë aktive e rrugëtimit arsimor të fëmijëve.
