Në Hagë po vazhdon gjyqi ndaj ish-krerëve të UÇK-së, përfshirë Hashim Thaçin dhe Kadri Veselin. Në seancën e fundit dëshmoi dëshmitari amerikan Jock Covey, i cili shërbeu pranë OKB-së në Kosovë në vitet 1999-2001.
Covey tha se UÇK-ja nuk ishte një ushtri e organizuar me komandë të qartë, por një lëvizje ku komandantët lokalë vepronin me autonomi. Ai shtoi se Hashim Thaçi nuk konsiderohej komandant i vërtetë nga UNMIK-u dhe nuk jepte urdhra drejtpërdrejtë.
Gjatë seancës u prezantua një dokument i nënshkruar nga Thaçi si “komandant i përgjithshëm i UÇK-së”, por Covey tha se ky ishte një veprim formal pa autoritet të vërtetë ushtarak.
Ai foli edhe për sfidat në integrimin e ish-luftëtarëve në Policinë e Kosovës dhe për marrëdhëniet e vështira mes Thaçit dhe komandantëve lokalë, ku Thaçi nuk kishte respekt të dukshëm.
Avokati i Thaçit tha se dëshmia konfirmon mungesën e autoritetit real të Thaçit gjatë periudhës së luftës.
