Kryeministrja italiane Giorgia Meloni ka kritikuar protestat që shoqërojnë grevën për solidaritet me flotën humanitare në Gaza, duke i cilësuar si një justifikim për të zgjatur fundjavën. Sipas saj, shumë nga ata që bojkotuan punën në Itali nuk ishin motivuar nga çështja humanitare, por nga dëshira për pushim më të gjatë.
Protestat, që kanë përhapje në Europë dhe në pjesë të tjera të botës, janë një reagim ndaj bllokimit nga Izraeli i ndihmave humanitare për Gazën. Ministri i Transportit, Matteo Salvini, paralajmëroi se dëmet ekonomike nga grevat mund të sjellin sanksione proporcionale.
Sociologu Mattia Diletti nga Universiteti “Sapienza” i Romës vuri në dukje se çështja palestineze ka qenë gjithmonë një temë me ndikim të madh në politikën italiane, duke prekur spektrin e gjerë politik.
Autoriteti Kombëtar i Grevave gjithashtu njoftoi se sindikatat kanë shkelur rregullat duke mos dhënë paralajmërimet e nevojshme për grevën.
