Dhoma Kombëtare e Avokatisë së Shqipërisë ka dënuar ashpër arrestimin e avokatit Ulian Barjami nga Policia e Elbasanit, duke e cilësuar këtë veprim si një shkelje flagrante të të drejtave të mbrojtjes dhe një akt arbitrar.
Sipas deklaratës zyrtare, arrestimi ka ndodhur gjatë një debati në sallën e gjyqit, ku avokati ka paralajmëruar një kallëzim penal për falsifikim provash ndaj prokurorit. Kjo deklaratë, sipas Dhomës së Avokatisë, është trajtuar në mënyrë të gabuar si “kanosje”, duke çuar në ndalimin e tij.
Kryetari i Dhomës, Maksim Haxhia, i ka bërë thirrje institucioneve të drejtësisë të reagojnë menjëherë, ndërsa ka shprehur shqetësimin për atë që e quan “shtet të prokurorëve” dhe jo një sistem drejtësie të bazuar në ligj dhe prova.
