Deputeti i Partisë Demokratike, Belind Këlliçi, ka ngritur akuza të forta ndaj disa drejtueseve të Ministrisë së Arsimit, duke i akuzuar për përfshirje të paligjshme në fushatën elektorale për Bashkinë e Tiranës në mbështetje të kandidaturës së Ogerta Manastirliut.
Sipas tij, katër drejtoresha të përgjithshme Mirela Cami, Matilda Shabani, Anisa Subashi dhe Entel Agolli në vend që të kryejnë detyrat e tyre në institucion, janë angazhuar si pjesë e strukturave të fushatës. Këlliçi e cilësoi këtë si një shkelje të drejtpërdrejtë të ligjit për Nëpunësin Civil dhe një dëshmi të shndërrimit të administratës në instrument partiak.
Ai theksoi se ky lloj militantizmi i strukturave shtetërore është një ndër shkaqet kryesore të krizës në sistemin arsimor, duke përmendur rënien në rezultatet ndërkombëtare si PISA, boshatisjen e klasave dhe rrezikun e mbylljes së fakulteteve.
Në përfundim, Këlliçi kërkoi marrjen e masave të menjëhershme për pezullimin e zyrtarëve të përfshirë dhe ndjekjen e tyre penale, duke apeluar për ndarjen e qartë të administratës publike nga partitë politike.
