Nicolas Sarkozy, i poshtëruar, u dërgua sot në burgun La Santé. Ish-presidenti francez përshëndeti turmat e mbështetësve ndërsa hynte në burg, i shoqëruar nga një Carla Bruni plot emocione.
Ish -presidenti francez, 70 vjeç, mbërriti në burgun La Santé të martën në mëngjes, ndërsa gazetarët dëgjuan të burgosurit duke bërtitur nga qelitë e tyre “Mirë se vini Sarkozy”, “Sarkozy është këtu”.
Dënimi i Sarkozisë i jep fund vitesh betejash ligjore mbi akuzat se fushata e tij zgjedhore e vitit 2007 mori miliona dollarë në para të gatshme nga udhëheqësi libian Muamar Gadafi.
“Nuk kam frikë nga burgu. Do ta mbaj kokën lart, madje edhe te portat e burgut”, i tha Sarkozy gazetës La Tribune Dimanche para burgosjes së tij.
Avokati i tij, Jean-Michel Darois, tha se ai mori me vete “disa bluza, pasi burgjet mund të jenë të ftohta, dhe disa tapa veshësh, pasi mund të ketë edhe shumë zhurmë. Ky izolim që ai do të kalojë është i dhimbshëm, por ai ishte i përgatitur”.
Duke folur jashtë një burgu në Paris menjëherë pas hyrjes së Sarkozisë, avokatët e tij zbuluan se ata tashmë kanë paraqitur një kërkesë për lirim me kusht, me misionin për ta nxjerrë atë nga burgu “sa më shpejt të jetë e mundur”.
Më shumë se 100 njerëz u mblodhën jashtë burgut këtë mëngjes pasi djali i tij, Louis, 28 vjeç, u bëri thirrje mbështetësve të mblidheshin për të atin në lagjen luksoze të Parisit ku jeton ish-presidenti francez. Një djalë tjetër, Pierre, kërkoi një mesazh dashurie – “asgjë tjetër, ju lutem”.
Ndërsa Sarkozi përgatitej të fillonte dënimin e tij, ai postoi një mesazh në mediat sociale, duke përsëritur pretendimet e tij për “pafajësi” dhe duke thënë se ndiente “trishtim të thellë” për Francën.
“Ndërsa përgatitem të kaloj muret e burgut La Santé, mendimet e mia janë me francezët e të gjitha klasave dhe pikëpamjeve shoqërore”, tha ai.
“Dua t’u them atyre me forcë të palëkundur se nuk është një ish-president i Republikës që po burgoset këtë mëngjes, por një person i pafajshëm.”
Ai shtoi: “Ndjej trishtim të thellë për Francën, e cila është poshtëruar nga shprehja e një hakmarrjeje që e ka çuar urrejtjen në një nivel të paparë. Nuk kam asnjë dyshim. E vërteta do të triumfojë. Por çmimi që do të duhet të paguajmë do të jetë i madh.”
Mbështetësit e tij brohoritën “Nicolas, Nicolas” ndërsa ai doli nga shtëpia dhe hipi në makinën që do ta çonte në burg, pasi i dha Carla Brunit një puthje të fundit dhe i tha lamtumirë turmës.
