Mediat në Kosovë kanë publikuar pamjet sipas tyre të ushtarëve të armatosur të xhandarmërisë serbe që kanë kaluar kufirin në fshatin Rakinicë të Podujevës, duke hyrë në territorin e Kosovës më 15 tetor.
Pamjet janë publikuar nga TV Dukagjini, i cili posedon një video ku shihen forcat serbe teksa kalojnë kufirin në pjesën veri-lindore, saktësisht në afërsi të Orllanit.
“Ne jemi në dijeni të kësaj ngjarjeje më 15 tetor. Ne ishim në kontakt me Forcat e Armatosura Serbe. Bazuar në informacionin e tyre, personeli i xhandarmërisë serbe po ndiqte individë të përfshirë në aktivitete të paligjshme të prerjes së pyjeve.
Sapo kuptuan se kishin kaluar Vijën Kufitare Administrative (ABL), ata u kthyen menjëherë në anën e Vijës Kufitare Administrative të Serbisë”, thuhet në përgjigjen e KFOR-it.
Sipas RTVDukagjinit, banorët e zonës, të cilët kanë filmuar ngjarjen, kanë konfirmuar për televizionin hyrjen e ushtarëve serbë, megjithëse nuk kanë pranuar të deklarohen publikisht.
Sipas tyre, gjatë incidentit, pjesëtarët e xhandarmërisë serbe kanë ofenduar dhe sharë banorët, ndërsa njërit prej tyre i është konfiskuar edhe traktori. Ditë më parë xhandarmëria serbe hyri në territor të Kosovës në veri, rrembeu një qytetar dhe u largua.
