Komisioni për Çështjet Ligjore dhe Administratën Publike ka nisur sot dëgjesat publike me kandidatët që garojnë për postin e ri të Avokatit të Popullit.
Pas shpalljes së vakancës në tetor dhe mbylljes së aplikimeve më 3 nëntor, janë paraqitur 26 kandidatë që synojnë këtë detyrë të rëndësishme kushtetuese.
Dëgjesat do të zhvillohen më 12 dhe 13 nëntor, duke nisur nga ora 14:00, në sallën e Komisionit të Ligjeve në Kuvend.
Në ditën e parë pritet të paraqiten disa prej kandidatëve më të njohur në fushën e drejtësisë dhe shoqërisë civile, ndërsa pjesa tjetër do të dëgjohet nesër.
Pas mbylljes së procesit, Komisioni do të përgatisë raportin përfundimtar me vlerësimin e secilit kandidat, i cili më pas do t’i kalojë seancës plenare për votim.
Sipas ligjit, Avokati i Popullit zgjidhet me tre të pestat e votave të deputetëve dhe e ushtron mandatin për pesë vjet.
