Gjykata Evropiane e të Drejtave të Njeriut në Strasburg e ka cilësuar të padrejtë shkarkimin nga vetingu të ish-gjyqtarit të Gjykatës së Lartë Shkëlzen Selimi. Vendimi i GJEDNJ-së konstaton shkelje të të drejtës për një proces të rregullt ligjor dhe hedh poshtë qëndrimin e institucioneve shqiptare që çuan në largimin e magjistratit në vitin 2018.
Në vendimin e saj, Gjykata e Strasburgut, me unanimitet, pranoi ankesat e Selimit që lidhen me të drejtën për një gjykim të drejtë dhe respektimin e jetës private, duke konstatuar shkelje të nenit 6 të Konventës Evropiane për të Drejtat e Njeriut. Gjykata vlerësoi se vetëm konstatimi i kësaj shkeljeje përbën kompensim të mjaftueshëm moral për ish-gjyqtarin.
Gjithashtu, Strasburgu i ka urdhëruar shtetit shqiptar t’i paguajë Selimit 6 mijë e 500 euro për shpenzimet e gjykimit brenda tre muajve nga hyrja në fuqi e vendimit, shumë mbi të cilën do të llogariten edhe interesat në rast vonese, sipas normës së Bankës Qendrore Evropiane plus tre pikë përqindje. Gjykata hodhi poshtë çdo kërkesë tjetër të Selimit për dëmshpërblim.
