Departamenti i Drejtësisë i SHBA-së ka publikuar një pjesë të dokumenteve që lidhen me Jeffrey Epstein, financier amerikan i akuzuar për trafikim dhe abuzim seksual të të miturve.
Dokumentet, të cilat përfshijnë foto, video dhe dokumente hetimore, priteshin pasi Kongresi miratoi një ligj që detyron që dosjet të publikohen të plota deri të premten.
Departamenti i Drejtësisë (DOJ), megjithatë, pranoi se nuk do të jetë në gjendje të publikojë të gjitha dokumentet brenda afatit të caktuar, shkruan BBC.
Një numër fytyrash të famshme janë përfshirë në grupin e parë të dosjeve – përfshirë ish-Presidentin e SHBA-së Bill Clinton, vëllain e Mbretit britanik, Andrew Mountbatten-Windsor dhe muzikantët Mick Jagger dhe Michael Jackson.
Të qenit i përmendur me emër ose i paraqitur në dokumente nuk është tregues i ndonjë shkeljeje apo keqbërjeje. Shumë prej atyre që janë identifikuar në dosje ose në publikimet e mëparshme që lidhen me Epstein kanë mohuar çdo shkelje.
Disa qindra mijëra faqe ende nuk janë publikuar.
Midis dokumenteve të publikuara të premten ka shumë që janë të redaktuara, duke përfshirë deklaratat e policisë, raportet hetimore dhe fotot.
Më shumë se 100 faqe në një skedar të vetëm, të lidhura me një hetim të jurisë së madhe, janë plotësisht të nxira.
Zyrtarët, siç përcaktohet në ligj, lejoheshin të redaktonin materialet për të mbrojtur identitetin e viktimave, ose çdo gjë që lidhet me një hetim aktiv penal, por ata ishin të detyruar me ligj të shpjegonin redaktimet e tilla, gjë që ende nuk është bërë.
Mijëra faqet e publikuara të premten janë vetëm një pjesë e asaj që do të vijë, sipas departamentit të drejtësisë.
Zëvendës Prokurori i Përgjithshëm Todd Blanche tha se departamenti po publikonte “disa qindra mijëra faqe” të premten dhe se ai priste që “disa qindra mijëra të tjera” të publikoheshin gjatë javëve të ardhshme.
Ai i tha Fox & Friends se departamenti po shqyrtonte me kujdes çdo faqe materiali për të siguruar që “çdo viktimë – emri i tyre, identiteti i tyre, historia e tyre, në masën që duhet të mbrohet – të jetë plotësisht e mbrojtur”.
Ky është një proces, argumentoi ai, që kërkon kohë.
Koha se kur do të publikohen materialet shtesë është e paqartë dhe ligjvënës nga të dy krahët politikë kanë shprehur frustrim.
Demokratët, përfshirë kongresmenin Ro Khanna, kanë kërcënuar me veprime kundër anëtarëve të Departamentit të Drejtësisë, përfshirë shkarkimin (impeachment) ose ndjekje të mundshme penale për shkak të vonesës.
Bill Clinton i fotografuar në pishinë dhe në vaskë me ujë të nxehtë
Disa nga imazhet e publikuara përfshijnë ish-Presidentin e SHBA-së, Bill Clinton.
Një foto e tregon atë duke notuar në një pishinë, ndërsa një tjetër e tregon të shtrirë mbi shpinë me duart pas kokës, në atë që duket të jetë një vaskë me ujë të nxehtë.
Clinton është fotografuar disa herë me Epstein gjatë viteve 1990 dhe fillimit të viteve 2000, përpara se financieri i diskredituar të arrestohej për herë të parë. Ai kurrë nuk është akuzuar për abuzim nga të mbijetuarit e abuzimeve të Epstein dhe ka mohuar se kishte dijeni për veprat e tij seksuale.
Një zëdhënës i Clinton komentoi mbi fotot e reja, duke thënë se ato janë të vjetra, nga dekada më parë.
‘Mund të publikojnë sa të duan foto të paqarta, mbi 20 vjeçare, por kjo nuk ka të bëjë me Bill Clinton. Nuk ka pasur kurrë dhe nuk do të ketë kurrë,’ shkroi Angel Ureña në rrjetet sociale.
‘Ka dy lloje njerëzish këtu. Grupi i parë nuk dinte asgjë dhe i ndërpreu marrëdhëniet me Epstein përpara se krimet e tij të bëheshin publike. Grupi i dytë vazhdoi marrëdhëniet me të edhe më pas. Ne jemi në grupin e parë. Asnjë vonesë nga njerëzit e grupit të dytë nuk do ta ndryshojë këtë,’ shtoi ai.”
