Presidenti i SHBA-së, Donald Trump u shfaq i kujdesshëm në një intervistë përpara takimit të tij me homologun e tij ukrainas, Volodymyr Zelensky.
Presidenti ukrainas pritet të takohet me Trump në Florida të dielën dhe ka thënë se do të paraqesë një plan të ri me 20 pika për t’i dhënë fund luftës në Ukrainë. Plani përfshin, ndër të tjera, një propozim për një zonë të çmilitarizuar, ndërsa takimi pritet të përqendrohet në garancitë e sigurisë së SHBA-së.
Megjithatë, në deklaratat për Politico, Donald Trump u shfaq i kujdesshëm ndaj iniciativës së re të Zelensky-t dhe nuk tregoi qëllim ta miratonte atë menjëherë. “Nuk është asgjë nëse unë nuk e miratoj” tha ai në mënyrë karakteristike. “Do të shohim se çfarë ka për të paraqitur”.
Siç thekson Politico, këto deklarata nënvizojnë masën në të cilën e ardhmja e Ukrainës varet nga bindja e Trump se është e gatshme të bëjë lëshime të mjaftueshme për të kënaqur një president i cili herë pas here është dukur i gatshëm të afrohet me qëndrimin rus nëse kjo çon në përfundimin e luftës.
Rusia ka lëvizur pak nga kërkesat e saj maksimale dhe nuk ka reaguar ndaj planit të fundit. Në të njëjtën kohë, Uashingtoni po i bën presion Zelensky-t që të braktisë kërkesat e tij fillestare, ndërsa Trump ka treguar shenja të përsëritura padurimi me negociatat.
Megjithatë, presidenti amerikan tha se priste bisedime produktive gjatë fundjavës. “Mendoj se do të shkojë mirë me të. Mendoj se do të shkojë mirë me [Vladimir] Putinin”, tha ai, duke shtuar se planifikon të flasë me presidentin rus “së shpejti, sa më shpejt të jetë e mundur”.
Komentet e Trump erdhën një ditë pasi Zelensky foli me të dërguarin special të SHBA-së, Steve Witkoff, dhe Jared Kushner, dhëndrin e presidentit të SHBA-së. Presidenti ukrainas e përshkroi bisedën si “të mirë”.
