Avokatët e ish-presidentit Ilir Meta kanë denoncuar procesin e hapur nga SPAK si një sulm të mirëorganizuar politik, duke theksuar mungesën e provave konkrete.
Sipas mbrojtjes ligjore, dosja voluminoze e hetimeve është e mbushur me dokumente dhe emra që nuk kanë lidhje me Metën, duke krijuar një përshtypje të rreme të rëndësisë së çështjes dhe duke e vështirësuar punën e avokatëve.
Ata argumentojnë se kjo është pjesë e një strategjie për të neutralizuar politikisht ish-presidentin.
“Çdo veprim i SPAK-ut dhe çdo kallëzim i depozituar pas 2018-ës duket pjesë e një strategjie të qartë për të goditur politikisht zotin Meta. Dosja është e mbushur me materiale që nuk kanë asnjë lidhje me të, ndërsa gjyqtarja paraprake nuk ka lexuar dosjen dhe nuk po vepron si një arbitre e paanshme,” deklarojnë avokatët, duke theksuar se qëllimi është të krijohet një iluzion i një procesi të rëndësishëm, pa prova konkrete.
