Presidenti i SHBA-së, Donald Trump, ka pranuar se zbatimi i ligjit për imigracionin mund të kërkojë “një prekje më të butë” pas të shtënave që çuan në vrasjen e dy qytetarëve amerikanë në Minneapolis muajin e kaluar, gjatë operacioneve të Shërbimit të Imigracionit dhe Doganave të SHBA-së (ICE). Në një intervistë me NBC News, Trump tha se ngjarjet e fundit mund të nxisin një rishikim të metodave të përdorura, megjithatë, ai theksoi se duhet të ruhet fortësia e politikave të deportimit, të cilat ai i ka cilësuar si të drejta për “kriminelët vërtet të rrezikshëm”.
“Ndoshta mund të na duhet pak më e butë, por prapëseprapë duhet të jesh i fortë,” tha Trump. Kur u pyet nëse vrasjet e Renee Good dhe Alex Pretti ishin të justifikuara, ai theksoi se ato nuk duhej të ndodhnin. “Nuk jam i kënaqur me dy incidentet. Askush nuk mund të jetë i lumtur dhe as ICE nuk ishte e lumtur,” shtoi ai.
Pasi protestat shpërthyen në pasojë të ngjarjeve, Shtëpia e Bardhë ndërmori veprime dhe e zëvendësoi komandantin e Patrullës Kufitare të SHBA-së, Gregory Bovino, me Tom Homan, një zyrtar të lartë të administratës Trump, i cili do të mbikëqyrë zbatimin e ligjit për imigracionin në Minnesota.
Incidentet dhe trazirat që pasuan kanë nxitur një debat të madh mbi politikat e imigracionit dhe përdorimin e forcës gjatë operacioneve të zbatimit të ligjit.
