Brad Arnold, këngëtari kryesor i grupit të njohur amerikan rock 3 Doors Down, ka ndërruar jetë në moshën 47-vjeçare, disa muaj pas diagnozës me kancer të veshkave në fazën e katërt. Lajmi u konfirmua nga grupi të shtunën përmes një deklarate, ku thuhet se Arnold “u nda nga jeta i rrethuar nga njerëzit e tij të dashur, në gjumë, pas një beteje të guximshme me kancerin”.
Grupi 3 Doors Down, i formuar në vitin 1995 në Misisipi, u bë i njohur në vitin 2000 me hitin e tyre “Kryptonite”, këngë që Arnold e kishte shkruar kur ishte vetëm 15 vjeç, gjatë orës së matematikës. Ky hit i siguroi grupit një nominim për Grammy, ndërsa albumi i tyre debutues, “The Better Life”, shiti mbi 6 milionë kopje.
Në vitin 2003, grupi fitoi një tjetër nominim për Grammy me këngën “When I’m Gone”, duke u konsoliduar si një nga emrat më të dashur të rock-ut alternativ. 3 Doors Down publikoi gjithsej gjashtë albume, me të fundit “Us and the Night” në vitin 2016.
