Dy ushtarë nga Koreja e Jugut kanë humbur jetën në një aksident ajror të ndodhur gjatë një stërvitjeje ushtarake në rrethin Gapyeong, rreth 55 kilometra në verilindje të Seulit. Ngjarja e rëndë ka ndodhur rreth orës 11:04, kur helikopteri AH-1S Cobra po kryente një manovër uljeje emergjente, pa fiksuar motorin.
Helikopteri kishte nisur fluturimin në mëngjes, rreth orës 09:45, për stërvitje ushtarake. Pas aksidentit, dy ushtarët që ndodheshin në bord u dërguan në spital, por fatkeqësisht nuk arritën të mbijetojnë.
Sipas ushtrisë, nuk janë regjistruar shpërthime apo zjarre në vendin e aksidentit, dhe nuk ka pasur as viktima civile. Pas ngjarjes, autoritetet ushtarake pezulluan përkohësisht fluturimet me modelin e helikopterit AH-1S Cobra dhe krijuan një ekip hetimor për të zbardhur shkaqet e aksidentit.
Hetimi është ende në zhvillim e sipër dhe pritet të ofrojë më shumë informacione për shkaqet e kësaj tragjedie.
