Këshilli i Ambasadorëve Shqiptarë (KASH) ka shprehur shqetësim të thellë për zhvillimet në gjyqin e Hagës ndaj krerëve të Ushtrisë Çlirimtare të Kosovës, duke theksuar se narrativa e krijuar mund të dëmtojë realitetin historik dhe juridik të Luftës së Kosovës.
KASH shprehet se barazimi i agresorit me viktimën është një fyerje ndaj popullit të Kosovës dhe aleatëve të tij perëndimorë, që ndihmuan në luftën për çlirimin e vendit.
“Kjo narrativë e deformuar rrezikon të relativizojë përgjegjësinë historike dhe politike të udhëheqjes serbe për krimet e kryera në Kosovë dhe do të ishte një padrejtësi e rëndë historike,” thuhet në deklaratën e Këshillit të Ambasadorëve Shqiptarë. “Çlirimi i Kosovës ishte akt legjitim i një populli të shtypur, dhe Ushtria Çlirimtare e Kosovës mbetet një forcë çlirimtare, jo objekt i revizionizmit.”
