Një efektiv i forcave “Shqiponja” ka mbetur i plagosur gjatë një operacioni për kapjen e një prej personave të shumëkërkuar, Klodian Llomi (Mazari), i cili është i kërkuar për veprat penale të shfrytëzimit të prostitucionit dhe pjesëmarrjes në një organizatë kriminale.
Operacioni ka nisur rreth orës 4:00 të mëngjesit, kur forcat e policisë kanë zbarkuar në banesën e 35-vjeçarit në fshatin Kërçisht, Maqellarë.
Gjatë tentativës për arrestimin e tij, efektivi i “Shqiponjave”, Gentian Meda, ka rënë nga një mur rrethues i banesës, duke pësuar lëndime të rënda në kokë.
Pas incidentit, ai është transportuar menjëherë në spitalin e Bulqizës dhe më pas është dërguar me helikopter për mjekim të specializuar në Spitalin e Traumës në Tiranë. Fatmirësisht, mjekët bëjnë të ditur se gjendja e tij është jashtë rrezikut për jetën.
Ndërkohë, Klodian Llomi është arrestuar dhe do të ekstradohet drejt Italisë, ku kërkohet për akuzat ndaj tij. Hetimet vazhdojnë për zbardhjen e rrethanave të ngjarjes dhe ndihmën e mundshme të tij në aktivitete kriminale.
