Deputetja Ina Zhupa ka reaguar kundër planeve të qeverisë për ndërhyrje në Muzeu Arkeologjik, duke i cilësuar ato si të papranueshme.
Zhupa u shpreh se është “turp i madh” që muzeu parashikohet të përfshihet në një projekt ku ka edhe kate parkimi.
Sipas saj, Shqipëria duhet të ketë një muze arkeologjik dinjitoz, me kushte të përshtatshme dhe të hapur për publikun.
Reagimi i plotë:
Të jetë atje për t’u vëzhguar nga shqiptarët, nga turistët, nga kushdo, dhe për të treguar historinë në dritën e diellit, e jo në katet e parkingjeve nëntokësore, sikur ta fshehim apo të turpërohemi nga ajo që jemi dhe nga ajo që kemi qenë.
Është një turp i madh kjo gjë që po bëni, që Muzeun Arkeologjik ta ktheni në një kat parkimi, ku në -3 të parkohen makinat, në -2 të kemi Muzeun Arkeologjik, në -1 të kemi përsëri parkim, dhe sipër të kemi një kullë.
Sepse kjo është degjenerim total i shtetit!
Është turp i madh dhe është e papranueshme, dhe është e palejueshme që një vend, i cili e ka detyrim thelbësor edhe nga Kushtetuta që të mbrojë identitetin kombëtar, të lartësojë emrin e shqiptarëve dhe të mbrojë historinë, kujtesën dhe trashëgiminë, të thotë se Muzeun Arkeologjik do ta bëjë kat parkimi.
