Zv/ kryeministri dhe ministri i Transportit të Maqedonisë, Aleksandar Nikolloski u shpreh se Shqipëria nuk do të bëhet anëtare e BE-së në të ardhmen e afërt për shkak të pasigurisë brenda vetë Unionit në lidhje me zgjerimin. Të njëjtën gjë e mendon edhe për Serbinë dhe Malin e Zi.
“Më vjen keq që kam të drejtë, sepse qëllimi im ishte të paralajmëroja në kohën e duhur. Roli i politikanëve është të marrin vendime bazuar në informacion, por edhe të informojnë publikun për realitetin, në mënyrë që ai të mund të përshtatet në përputhje me rrethanat. Është mirë që po ndjekim një politikë dinjitoze në lidhje me integrimin evropian dhe nuk e poshtërojmë kombin dhe shtetin tonë. Ne nuk gjunjëzohemi, por e ndjekim politikën me dinjitet” tha ai.
