Pas përjashtimit nga grupi i PD-së, Lulzim Basha u ka ndryshuar edhe vendin deputetëve që i dolën kundër duke u pozicionuar me Sali Berishën. Luan Baçi iu ankua kryetares së Kuvendit, Lindita Nikolla se e zhvendosën në rreshtin e fundit. Ai përpara këtyre lëvizjeve kërkoi më parë një konsultim paraprak.
“Te vendi që do të ulesha gjeta një emër tjetër. Mendoj se ju duhet të konsultoheni përpara se të merrni këto vendime dhe të bëni përjashtime nga grupi apo pezullime.
Është në detyrën tuaj që ne të marrim një informacion paraprak përpara se të ndodhemi në këto situata. Dikush më tha se emrin e ke në korridor dhe do të rrish në korridor.
Basha mund t’ju sjellë shkresë pas shkrese për të ndërruar vendet e deputetëve si nxënësit në shkollë dhe ju jeni drejtoresha e shkollës, ku duhet të dënoni një nxënës duke e çuar në vendin e fundit. Përpara se të bëni veprime të tilla ne duhet të informohemi që mos të përballemi me situata të pazakonta.
Sa për dijeninë tuaj dhe të Bashës unë jam deputeti më i votuar në Fier. Hiqni dorë nga marrëveshja që kini të hapur tashmë duke zbatuar cdo porosi të deputetit Basha” tha ai.
/5pyetjet.al
