Drejtori i të ashtuquajturës “Zyra për Kosovën” në Qeverinë e Serbisë, Petar Petkoviq, ka paralajmëruar pasoja “të paparashikueshme” nëse nuk lejohet mbajtja e zgjedhjeve të 3 prillit në Kosovë.
Mbajtja e këtyre zgjedhjeve sipas Petkoviqit është me rëndësi vendimtare për Serbinë dhe se “çështja e votës është një e drejtë themelore e njeriut, të cilën Albin Kurti po përpiqet t’ia mohojë popullit serb në provincën jugore”.
Ai ka deklaruar se nëse nuk mbahen zgjedhjet e 3 prillit “nuk do të ketë më zgjedhje të Kosovës në veri të saj”.
“Ne s’do të vëzhgojmë verbërisht se çfarë po ndodh në Kosovë. E kemi paralajmëruar vazhdimisht komunitetin ndërkombëtar, i cili është përgjegjës për presionin ndaj Albin Kurtit dhe Prishtinës për të mbajtur zgjedhjet më 3 prill”.
“Është shumë e qartë se nëse nuk ka zgjedhje të 3 prillit, nuk do të ketë më zgjedhje të Kosovë në veri të saj. Do të kemi pasoja të paparashikueshme,” tha Petkoviq, raporton Tanjug.
