Debati parlamentar për dialogun Kosovë-Serbi do të zhvillohet sot në seancën plenare të Kuvendit. Ky diskutim i planifikuar dje u shty nga të gjitha grupet parlamentare për shkak të mungesës së zëvendëskryeministrit Besnik Bislimi.
Shefi i deputetëve të Aleancës për Ardhmërinë e Kosovës(AAK), Besnik Tahiri ka kërkuar shtyrjen.
“Është mirë me qenë prezent edhe zëvendëskryeministri i parë zotëri Bislimi, i cili është po ashtu përgjegjës për dialog dhe jemi dakorduar ta shtymë debatin për ditën e premte në ora 11:00″, ka thënë Tahiri.
Kërkesën e Tahirit e ka përkrahur edhe Lëvizja Vetëvendosje(LVV), Partia Demokratike e Kosovës(PDK) dhe Lidhja Demokratike e Kosovës(LDK) sipas së cilëve diskutimi duhet të bëhet kur i pranishëm është kryenegociatori.
