Presidenti sirian Bashar Assad, zhvilloi vizitën e tij të parë në Emiratet e Bashkuara Arabe që nga shpërthimi i luftës civile në Siri në 2011.
Në një deklaratë të postuar në mediat sociale, zyra tha se Assad u takua me Sheikh Mohamed bin Rashid Al Maktoum, zëvendëspresident dhe kryeministër i Emirateve të Bashkuara Arabe dhe sundimtari i Dubait. Të dy diskutuan për zgjerimin e marrëdhënieve dypalëshe midis vendeve të tyre.
Vizita dërgon sinjalin më të qartë se bota arabe është e gatshme të ri-angazhohet me presidentin e Sirisë që dikur ishte mënjanuar gjerësisht.
Siria u përjashtua nga Liga Arabe prej 22 anëtarësh dhe u bojkotua nga fqinjët e saj pas shpërthimit të konfliktit 11 vjet më parë. Qindra mijëra njerëz janë vrarë në luftën, e cila zhvendosi gjysmën e popullsisë së Sirisë. Pjesë të mëdha të Sirisë janë shkatërruar dhe rindërtimi do të kushtonte dhjetëra miliarda dollarë.
Vendet arabe dhe perëndimore në përgjithësi fajësuan Assad-in për shtypjen vdekjeprurëse të protestave të vitit 2011 që evoluan në luftë civile dhe mbështetën opozitën në ditët e para të konfliktit.
Me luftën që ka rënë në një ngërç dhe Assad-i ka rimarrë kontrollin mbi pjesën më të madhe të vendit falë ndihmës ushtarake nga aleatët Rusia dhe Irani, vendet arabe janë afruar më shumë drejt rivendosjes së lidhjeve me udhëheqësin sirian në vitet e fundit.
