E premtja e 25 marsit është shpallur ditë zie në Kosovë në nderim të ish-Sekretares së Amerikës, Madeleine Albright, e cila ndërroi jetë dy ditë më parë më 23 mars.
Presidentja e Kosovës Vjosa Osmani, e ka shpallur këtë ditë – ditë zie, ndërsa lajmin e ka bërë të ditur Kryetari i Kuvendit të Kosovës, Glauk Konjufca.
“Për shkak se ka ndërruar jetë Madeleine Albright e cila ka dhënë kontribut që s’do ta harrojmë si popull për lirinë dhe pavarësinë e shtetit tonë, presidentja e ka shpallur ditë zie të premten, dhe në konsultim me kryetarët e grupeve parlamentare këtë seancë e zhvendosim për ditën e hënë”, ka thënë Konjufca.
“Në shenjë respekti shtetëror, dita e premte, datë 25 mars 2022, shpallet ditë zie në Republikën e Kosovës për të kujtuar miken e madhe të Kosovës, Madeleine Albright e cila u nda nga jeta dje”, ka thënë Presidentja e Kosovës Vjosa Osmani.
