Guvernatori i rajonit Sumy Oblast në Ukrainë, Dmytro Zhyvytsky, ka deklaruar se të paktën tre trupa civilësh të torturuar dhe të vrarë janë gjetur nga Ushtria ukrainase pas kontrolleve të bëra në rajon.
Lajmin e ka raportuar media ukrainase “The Kyiv Indipendent”, duke iu referuar vetë pretendimeve të guvernatorit.
Sipas raportimeve, trupat janë gjetur në qytezën Konotop në distriktin e Sumy Oblast dhe po punohet për të zbuluar arsyet e vërteta të vdekjes së tyre.
Hamendësimet paraprake bien mbi faktin se forcat ruse janë përgjegjëse për krimin, përpara se ato të largoheshin nga zona që kishin mësyrë.
Ky lajm vjen dy ditë pas atij në Bucha, ku qindra trupa civilësh u gjetën të dergjur në rrugë ose të groposur në varre masive. Një akt barbar i cili i është atribuuar Ushtrisë ruse deri tani, duke akuzuar edhe drejtpërdrejt Vladimir Putinin për gjenocid.
