“Lidhjet ndërmjet Serbisë dhe Republika Srpska, nuk kanë qenë kurrë më të forta dhe askush nuk do të mund t’i prishë ato”.
Kështu është deklaruar Presidenti i Serbisë Aleksandër Vuçiç i cili të premten e 15 prillit ka takuar anëtarin serb të Presidencës së Bosnjës dhe Hercegovinës, Milorad Dodik.
Në takim thuhet se është rënë dakord për mbështetjen e Serbisë për Republikën Srpska në fushën e ekonomisë dhe më gjerë.
“Ne diskutuam të gjitha çështjet e rëndësishme, kuptuam peshën e pozitës së popullit serb sot. Paqja dhe stabiliteti në rajon janë interesa thelbësore të të dyja vendeve”, ka shkruar Vuçiç në llogarin e tij në Instagram.
Siç thuhet në llogarinë e Presidentit të Serbisë në Instagram, Dodik i tha Vuçiç-it se ai dhe Republika Srpska janë nën presion të madh në lidhje me situatën e brendshme politike në BeH.
Vuçiç tha se Serbia nuk do ta pranojë dhe nuk mund ta pranojë aplikimin e fuqive të Bonit dhe as vendosjen e sanksioneve ndaj lidershipit të Republikës Srpska.
Vuçiç dhe Dodik ranë dakord që pas formimit të Qeverisë së re të Serbisë, seanca e parë e përbashkët të mbahet në Banja Luka.
