Policia e Krujës arrestoi një të ri, pasi akuzohet se mori peng një 20-vjeçar, duke e çuar në një zonë të pyllëzuar në Krastë, e më pas e goditi me sende të forta në pjesë të ndryshme të trupit.
“Në kuadër të operacionit policor të koduar “Krasta” u bë e mundur kapja dhe arrestimi në flagrancë i shtetasit Drilon Hoxha, 22 vjeç, banues në Fushë-Krujë. Ky shtetas kishte marrë në automjetin e tij tip Audi, 20-vjeçarin B. A., banues në Fushë-Krujë, duke e çuar në një vend të pyllëzuar në Krastë, të cilin, më pas e ka goditur me sende të forta në pjesë të ndryshme të trupit.
Drilon Hoxha i ka marrë shtetasit B. A. edhe telefonin që ky i fundit kishte në përdorim. Gjatë kontrollit të ushtruar nga Policia, në automjetin tip Audi, që drejtohej nga Drilon Hoxha, u gjet dhe u sekuestrua, në cilësinë e provës materiale, telefoni, që i përkiste shtetasit B. A.
Nën drejtimin e Prokurorisë po punohet për zbardhjen e plotë të motivit të kësaj ngjarjeje. Materialet i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme, për veprat penale “Heqja e paligjshme e lirisë”, “Plagosja e lehtë me dashje” dhe Vjedhja me dhunë“ mbyllet njoftimi.
