Presidenti i Republikës, Ilir Meta gjatë vizitës që po zhvillon në Baku u prit në një takim nga homologu i Azerbajxhanit, Ilham Aliyev. Meta vlerësoi marrëdhëniet e “shkëlqyera midis dy vendeve, si dhe potencialin e jashtëzakonshëm që ekziston për forcimin e gjithanshëm të tyre në fushat me interes reciprok”.
Presidenti shqiptar shprehu mirënjohjen e thellë për mbështetjen e dhënë nga Azerbajxhani, si dhe nga Aliyev për ndërtimin dhe zbatimin e suksesshëm të gazsjellësit TAP.
Po sipas njoftimit të zyrës së shtypit të Presidencës, Meta theksoi rëndësinë e jashtëzakonshme që merr gazsjellësi TAP për sigurinë energjitike të Europës, në kontekstin e zhvillimeve të fundit, si burim alternativ energjie.
“Në këtë kuadër, të dy presidentët vlerësuan nevojën jetike të fuqizimit të mëtejshëm të TAP, si dhe të zbatimit të shpejtë të projektit IAP (Gazsjellësi Adriatiko-Jonian), që do të sillte një impakt më të madh për zhvillimin e Ballkanit Perëndimor.
Në bisedën e frytshme u nënvizua me shumë interes thellimi i bashkëpunimit në fushën e ekonomisë, tregtisë dhe turizmit, si dhe rritja e mëtejshme e shkëmbimeve midis dy vendeve” mbyllet njoftimi.
