Në Elbasan është ndarë nga jeta në moshën 86-vjeçare, furrtari i famshëm i qytetit, Xhevat Koburja. Ai për 70 vite ka ushtruar profesionin e bukëpjekësit dhe ishte një nga më të shquarit në këtë fushë në Elbasan dhe jo vetëm, teksa sipërmarrja e familjes së tij njihej kudo në Shqipëri me emrin “Furra e Xhevatit”.
Për ndarjen e tij nga jeta ka reaguar edhe deputeti i Partisë Demokratike në qarkun e Elbasanit, Luçiano Boçi, i cili shprehet se furrtar Xhevati është nga ata njerëz heronj që ne duhet të mësojmë t’i vlerësojmë për punën e tyre.
POSTIMI I BOÇIT:
NJERIU I PUNËS
E kush nuk e njeh Xhevatin, bukëpjekësin më me nam në Elbasan!?
Të gjithë ne nga Elbasani e jo vetëm, kemi pasur fatin të ikim tek “Furra e Xhevatit” dhe të provojmë bukën e tij, mikpritjen e tij dhe buzëqeshjen e pandarë.
Po tavat e gjelit të detit, bakllavatë e ballokumet që piqte Xhevati a i mbani mend?!
Të mrekullueshme si vetë thjeshtësia e tij.
Por tani Xhevati i famshëm nuk është më midis nesh.
Zoti e desh në lartësitë e tij qiellore, ndoshta për t’i gatuar dhe Atij atje në parajsë bukën e tij “të ëmbël”, së bashku me Zajen e tij të dashur.
Xhevati ishte nga ato njerëz që ne i kemi aty midis nesh dhe nuk e dimë që janë vërtet heronj.
Tamam tamam. Ai ishte heroi i punës dhe i ndershmërisë së të bërit biznes “me djersë”!
Punoi deri në ditën e fundit, sepse jeta për të ishte punë dhe përkushtim ndaj familjes së tij të shenjtë.
I lehtë dheu dhe i përjetshëm kujtimi miku im!
Mbi të gjitha Ti ishte shok i mirë i babait tim!
Lamtumirë bukëpjekësi i jetës!
