Mëngjesin e sotëm besimtarët myslimanë falën Kurban Bajramin në xhami dhe sheshe në të gjithë vendin. Në Tiranë edhe këtë vit nuk u arrit që të hapet xhamia e re e Namazgjasë. Besimtarët e falën Bajramin në sheshin “Skënderbej”.
Kreu i KMSH, Bujar Spahiu në fjalën e tij përpara besimtarëve kishte një thirrje për të rinjtë, që po largohen cdo ditë e më shumë nga vendi.
“Gëzuar e për shumë vite festen e Kurban Bajramit kushdo qe e feston! Vetëm te mira paçi gjithmonë bashkë me njerëzit e tu të zemrës!
Kjo ditë është dita kur duhet të jemi të njerëzishëm me njëri-tjetrin. Njeriu është vepër madhështore e Allahut dhe mjerë për atë që e çmon nderin e tij. Zbutni zemrat me njëri-tjetrin, ruani veten nga ligësitë dhe padrejtësitë, mos u bëni lakmitarë.
Kam një apel për rininë: Pajisuni me moral të bukur, kthejini sytë nga Zoti, rrini larg tundimeve të kota. Mos ikni nga vendi, projektojeni të ardhmen këtu, në vendin tuaj” tha ai.
