Scott Morrison thotë se nuk do të japë dorëheqjen nga parlamenti federal, pasi u zbulua të kishte bërë pesë emërime sekrete, duke i dhënë vetes edhe rolin e ministrit në pesë ministri të ndryshme.
Morrison është duke mbrojtur vendimin e tij për t’i mbajtur ato ministri të fshehura, meqë ai thotë se nuk i ka ushtruar kurrë kompetencat e dhëna.
Morrison, i cili është nga Partia Liberale dhe që ka qeverisur nga viti 2018 deri në maj 2022, midis marsit 2020 dhe majit 2021 iu caktuan rolet e Ministrit të Shëndetësisë, Financave, të Brendshme, Thesarit dhe Industrisë dhe Burimeve Natyrore, duke i administruar ato departamente së bashku me ministrat që kishin kompetencë të drejtpërdrejtë.
Sipas asaj që u zbulua nga gazetat australiane dhe u konfirmua më vonë nga vetë Morrison, ish-kryeministri ia kishte caktuar vetes ato role i vetëm dhe në fshehtësi, pa e shpallur publikisht dhe pa bërë një betim zyrtar. Pothuajse në të gjitha rastet as ministrat në krye të atyre ministrive nuk ishin në dijeni të kësaj.
“Unë besoja se ishte e nevojshme të kisha autoritet, të kisha ato që ishin në fakt kompetenca emergjente, për të ushtruar në situata ekstreme të paparashikuara kompetencat, që do të më mundësonin të veproja në interesat kombëtare”, tha ai për vendimin e tij.
Njeriu që nënshkroi emërimet, guvernatori i përgjithshëm, David Hurley, adresoi “pyetjet rreth fshehtësisë” të mërkurën duke deklaruar se ato ishin çështje për qeverinë e mëparshme të Koalicionit.
“Nuk është përgjegjësi e guvernatorit të përgjithshëm të këshillojë ministrinë ose parlamentin (ose publikun) më të gjerë për ndryshime administrative të kësaj natyre,” tha një zëdhënës në një deklaratë. “Guvernatori i përgjithshëm nuk kishte arsye të besonte se emërimet nuk do të komunikoheshin.”
Morrison ka refuzuar të thotë nëse guvernatori i përgjithshëm i ka kërkuar që t’i bëjë publike emërimet.
Kryeministri, Anthony Albanese, të mërkurën akuzoi Morrison për një “mashtrim të qartë të parlamentit” dhe i sugjeroi Morrisonit t’i kërkonte falje popullit australian.
