Republika Çeke ka thirrur një takim të jashtëzakonshëm të ministrave të energjisë të Bashkimit Evropian. Ky takim vjen mes një rritjeje të çmimeve dhe shqetësimeve për furnizimet e shkaktuara nga pushtimi i Ukrainës nga Rusia.
Takimi do të mbahet në 9 shtator.
Sikela, ministri çek i Industrisë tha se një zgjidhje e mundshme do të ishte kufizimi i çmimit për gazin e përdorur në prodhimin e energjisë elektrike.
“Ne duhet të ndajmë çmimet e gazit nga çmimet e energjisë elektrike”, tha ai.
Blloku prej 27 vendesh ka ndërmarrë hapa për të pakësuar varësinë e tij nga importet ruse të energjisë.
Plani u prezantua për t’u përgatitur për një ndalim të mundshëm të furnizimeve të gazit natyror rus.
Roli mbizotërues i Rusisë si furnizues i energjisë për BE-në ka çuar në shqetësimet se Moska mund të kufizojë furnizimet gjatë dimrit.
Sipas Komisionit Evropian, 45 miliardë metra kub gaz duhet të kursehen për të arritur objektivin gjatë shtatë muajve të ardhshëm.
Gjermania përbën rreth 40 për qind të gazit natyror rus të importuar nga Bashkimi Evropian.
Marrëveshja për zvogëlim vullnetar të përdorimit të gazit mund të bëhet e detyrueshme në rast të ndonjë emergjence.
Javët e fundit në Bashkimin Evropian janë raportuar çmime rekord të gazit natyror dhe energjisë elektrike.
