Prokuroria Themelore në Ferizaj është duke vazhduar hetimet në rastin Brezovica dhe në lidhje për këtë rast është kërkuar paraburgim edhe për një person.
Këtë e ka bërë të ditur Prokuroria përmes një komunikate për media.
“Sepse ekziston dyshimi i bazuar se i njëjti, në vitin 2018 në bashkëkryerje ka kryer veprën veprën penale “Marrja e ryshfetit” në ndihmë nga neni 428 paragrafi 2 lidhur me nenin 31 dhe 33 të KPRK-së”, thuhet në njoftimin e Prokurorisë.
Qëllimi i aksionit “Brezovica” është identifikimi i ndërtimit të objekteve në zonat e mbrojtura të parkut kombëtar.
Më 19 gusht, Prokuroria Themelore në Ferizaj, është duke vazhduar operacioni për identifikimin dhe regjistrimin e vikendshtëpizave në zonën e Brezovicës.
Pesë aksionet “Brezovica”
Nga pesë aksionet e mëparshme të policisë dhe prokurorisë në këtë rast, deri më tani janë arrestuar 26 të dyshuar, prej të cilëve 4 janë liruar në procedurë të rregullt dhe 19 prej tyre iu është caktuar masa e paraburgimit, kurse u janë bllokuar afër 6 milionë euro.
Ndërsa, tre të dyshuarve në këtë rast, iu është caktuar masa e sigurisë, me të cilën iu është urdhëruar paraqitja në stacion policor dhe ndalimi për t’iu ofruar vendit apo personit të caktuar.
Në mesin e këtyre të arrestuarve, është edhe ish-kryetari i Komunës së Shtërpcës, Bratislav Nikoliç, i cili dyshohet se ka përfituar 1 milion euro jashtëligjshëm nga dhënia e lejeve për ndërtim të villave në zonën e Brezovicës.
Ndryshe, aksioni “Brezovica”, filloi më 21 dhjetor 2021 dhe është i udhëhequr nga prokurori Rasim Maloku nga Prokuroria Themelore në Ferizaj, në koordinim me Policinë e Kosovës -Drejtorinë e Krimeve të Rënda në Prishtinë, të cilët kanë zhvilluar këtë aksion në Komunën e Shtërpcës
