Kancelari gjerman, Olaf Scholz, i ka bërë thirrje presidentit rus, Vladimir Putin, që të tërhiqet plotësisht nga Ukraina.
Ai në një telefonatë me Putin i ka kërkuar që të tërheqë plotësisht trupat e tij nga Ukraina.
“Duhet një zgjidhje diplomatike sa më shpejt të jetë e mundur, bazuar në një armëpushim, një tërheqje të plotë të forcave ruse dhe respekt për integritetin territorial dhe sovranitetin e Ukrainës”.
Gjithashtu Scholz i bëri thirrje Putin që t’i përmbahet një marrëveshjeje për eksportet e grurit nga Ukraina, të cilën Moska e ka kritikuar vazhdimisht.
Në telefonatën 90-minutëshe, Scholz theksoi nevojën për të garantuar sigurinë e termocentralit bërthamor Zaporizhia në Ukrainë.
“Kancelari theksoi se çdo hap i mëtejshëm i aneksimit rus nuk do të mbetet pa përgjigje dhe nuk do të njihet në asnjë rrethanë”, tha zyra e tij në deklaratë, duke shtuar se Scholz dhe Putin ranë dakord të qëndronin në kontakt.
